بحلم

حزينه

2009-05-11T17:27:00.000-07:00

مش عارفه ليه ممكن لما اكون فرحانه اوي ممكن مفتكرش المدونه او لما اكون زهقانه مثلا برضه ببقي عادي ممكن احكي لاي حد لكن لما ببقي حزينه اوي كده زي دلوقتي ومخنوقه وعندي مشاكل كتير مش عارفه ليه ببقي عاوزه اجري اكتب علي المدونه يمكن علشان مش عاوزه احكي لحد بس انا كده خليت المدونه كئيبه اوي وخصوصا اني بقالي كتير مكتبتش حاجه اجي اكتب نكد كده وانا اساسا مش عارفه اكتب ايه بس تايهه اوي ومكتئبه ممكن احكي وخلاص الحاله اللي انا فيها لاني متاكده ان مفيش حد هيدخل عليها بعد المده دي كلها الا حد كده بيتفسح وفتحها قدرا

بس مش عارفه ليه عاوزه اكلم وخلاص كده مع اي حاجه حتي لو الكمبيوتر نفسه

بعد نص الليل الساعه دلوقتي 3ونص والامتحانات بعد 3 ايام وايمان اختي في وسط الامتحانات وقاعده في الاوضه بتذاكر وعندها امتحان الصبح

فضلت اقولها اطفي النور انا هنام دلوقتي خلصت مذاكره وزهقت الكلام ده كان الساعه واحده وبعدين دخلت في السرير فضلت اعيط تحت البطانيه لغايه الساعه اتنين وبعدين قلت انا كده ممكن يجرالي حاجه ومش عارفه انام قمت غسلت وشي وفضلت استخبي علشان ايمان متخدش بالها من حاجه والاخر قلت ادخل علي النت شويه يمكن انسي الحاجات اللي مضايقاني لقيت نفسي كل اما ادخل علي مدونه واقرا افضل اعيط اقول طيب اشغل اناشيد افراح يمكن انبسط شويه برده مفيش فايده دخلت علي مدونه ايمان وقرات اخر موضوع لقيته عن كتب كتابي انه قرب وان ايمان خايفه ان انا اتجوز ونفترق قامت جاتلي حالت هستريا وفضلت اعيط بصوت عالي لغايه ما حسيت ان روحي هتطلع فضلت ادعي ان ربنا يفك عني وينسيني همومي ويخليني اذاكر شويه ولقيتني بقول انا نفسي اعيط لغايه ما ارتاح طب اخلي دموعي دي وانا بصلي واشتكي لربنا هو الوحيد اللي ممكن افضفضله وانا مطمنه ومينفعش اخبي عليه لاني عارف سري وعلني بس قلت الاول اكتب علي المدونه اشمعني ايمان بتكتب وكل اللي عندهم مدونه بيكتبو وانا اللي سايبه كل حاجه وعايشه في دنيا لوحدي قعدت اكتب الموضوع وشغلت في ودني نشيد عزيز علي اوي

بك استجير ومن يجير سواك

فاجر ضعيفا يحتمي بحماك

مش عارفه ممكن حد يقرا الموضوع ده ولا فعلا مبقاش في حد يدخل علي مدونتي بس عموما اللي يقراه يدعيلي اكيد انا محتاجه دعوات مش دعوه واحده

الازمه الماليه العالميه وركاب الاتوبيس

2008-10-21T04:55:00.000-07:00

محادثه جميله سمعتها بين اتنين من ركاب الاتوبيس بتاع هيئه النقل العام يعني اتنين من الشعب المصري المطحون واحد منهم كان باين من صوته ومن كلامه عن ولاده وشغله انه في اواخر الاربعينات والتاني في حدود تلاتين سنه وتقريبا مدرس

طبعا بدايه الحوار كان عن الموضوع اللي كل المصريين بيتكلموا مع بعض فيه او حتي بيكلموا نفسهم بسببه وهو الغلا والمدرس كان زعلان ان الاتوبيس بقي بجنيه وبيدفع كده اي حد حتي لو نازل بعد كام محطه ومش بيستفاد بيه بجد غير اللي رايحين مسافات بعيده التاني كان مبسوط شويه لانه وفر عليه كتير اوي ومفيش ميكروبصات بتمشي المسافه دي كلها لانه بييجي من مسترد لغايه اكتوبر المهم الحوارطول اوي وراح وجه ودخل في مواضيع كتير لغايه ما وصل للازمه الماليه العالميه
الراجل العجوز بقي قال كلمتين حسيت بجد انهم ملخص كل اللي بيحصل والحل كمان للازمه بس اللي يفهم صح بقي

الراجل بكل بساطه قاله بص يا عم الازمه دي كانت هتحصل هتحصل السنه دي ولا السنه الجايه ولا بعد ميه سنه ده وعد من ربنا لان دي كلها بنوك وبتتعامل بالربا مش عاروزين ربنا يخرب بيتهم ؟! دي الايه في القران بتقولك "يمحق الله الربا ويربي الصدقات "وهيفضلو يحلو فيها وبردك ربنا مش هيريحهم .

بجد انا سمعت الكلمتين دول وحسيت براحه غريبه ودار في بالي اوي هتافنا في الانتخابات اللي كنا بنقول فيه

الاسلام هو الحل ..شرع المولي عز وجل وقلت في نفسي الحمد لله ان الناس البسيطه دي فاهمه كده يارب علماء الاقتصاد العالمين يفهمو هم كمان

ودي كانت مره من احلي المرات اللي ركبت فيها الاتوبيس علي الرغم من ان دي مش اول مره اتعلم من كلام الناس اللي بيرغو فيه مع بعض علشان يقصروا المسافه سواء في الاتوبيسات او الميكروباصات

وبعد شويه في الاتوبيس ده طلع المفتش وسأل الناس عن التذاكر وكان في واحد مش معاه تذكره قال انه دفع بس رمي التذكره من الشباك وطبعا المفتش صمم انه يدفع تمن تذكره تانيه والراجل صمم انه ميدفعش وحصلت مشاده جامده صراحه كانت اول مره اشوف فيها مفتش في الاوتوبيسات العاديه دي الاحمر والازرق واستغربت اوي ليه لما كانت التذكره بربع جنيه مكنش بيطلع مفتشين غير كل سنه مره وليه لما بقت بجنيه بقي يطلع كل يوم ؟؟؟؟ سؤال يطرح نفسه

وفي النهايه

عمار يا مصر

2008-10-07T13:54:00.000-07:00

يااااااااااااااااااااااااااه

الايام بتعدي والزمن بيجري بطريقه غريبه

مين كان يصدق ان رمضان عدي وخلص والعيد خلص والدراسه بدأت وكمان فاضل تقريبا شهرين ونص علي امتحانات نص السنه

ولا مين يصدق ان كلها شهرين ونبقي في سنة 2009

هي فين سنة 2008 اصلا حد شافها ولا حس بيها

لا بجد انا بدأت اخاف اوي علي نفسي وعلي عمري

حاسه ان سنين عمري عماله بتعدي كانها بتطير

بعد ما كان كل اللي بيساني عندك كام سنه بقول 14 و15 ولسه في اعدادي وبعدين ثانوي مش راضي يخلص فجأه بقيت 21 وخلاص كلها سنه و اتخرج

انا نفسي اعرف التلات سنين بتوع الكليه دي عدو ازاي

سبحان الله فعلا الدنيا دي ماهي الا غرور ولعب ولهو

فانيه بجد ومضلله ومحتاجه الواحد يبقي مصحصح لها اوي ويقف لها كل شويه وميسبهاش تضحك عليه وتضيع عمره من غير ما يخزن للاخره ويتزود للرحله

كل ما افتكر الناس اللي عاشرتهم سنين واكلنا وشربنا وضحكنا مع بعض وبعدين ماتو فجأه اقول سبحان الله

راحو فين ولا مين فاكرهم

احنا دايما بنفتكر احدث ميت ولما بيموت اللي بعده بننساه ونفتكرالاخيروندعيله وبعديها بشويه بننسي الاتنين ونتوه تاني في الدنيا لغايه ما ييجي الدور علينا

كل ما افكر فعلا ان في حسن خاتممه وسوء خاتمه وان محدش عارف عمره ده هيخلص امته ولا فين او ازاي بتجيلي حالة رعب من الغفله اللي فيها كتير من الناس وانا من ضمنهم

نفسي افوق وافضل فايقه علي طول فوقه مغفلش بعدها ابدا لغاية ما اموت وربنا راضي عني

وحشتوني

2008-08-10T17:10:00.000-07:00

وحشتني المدونه ،وحشتني الكتابه علي الكيبورد ووحشتني التعليقات ، وحشتني حفصه جوده وساره بنداري وكل الناس اللي اتعرفت عليهم عن طريق المدونه وشاركوني جو جميل
ان شاء الله هرجع للمدونه قريب اوي بعد غياب غير مبرر لفتره غير قصيره بس ان شاء الله هحاول ارجع بصفه مستمره وان كانت مش يوميه بس هحاول تكون اسبوعيه
نفسي بس اولا اقول لكل اللي هيدخل المدونه كل عام وانتم الي الله اقرب وعلي طاعته ادوم بمناسبه حلول شهر شعبان وقرب حلول رمضان واسال الله ان يبارك لنا في شعبان ويبلغنا جميعا رمضان ويتقبله منا
ابنة الاسلام

كلب ينتفض وبشر يتفرج

2008-02-23T09:09:00.000-08:00

ذكر عن جمال الدين ابراهيم بن محمد الطيبي ان بعض امراء المغول تنصر فحضر عنده جماعه من كبار النصاري والمغول فحضر واحد منهم ينتقض ويسب في محمد -صلي الله عليه وسلم -وهناك كلب مربوط فلما اكثر من ذلك وثب عليه الكلب فخشمه فخلصوه منه فقال بعض من حضر :هذا كلامك في محمد-صلي الله عليه وسلم -فقال كلا بل هذا الكلب عزيز النفس راني اشير بيدي فظن اني سأضربه ،ثم عاد الي ما كان فيه من سب النبي وأطال ،فوثب عليه الكلب ولم يتركه حتي مات ،فأسلم بذلك اربعون الف من المغول

كلب يغار ......ونحن نسمع ليل نهار ما يحدث للاسلام ...فمتي نتحرك؟؟؟؟؟؟؟؟؟

حبيبتي ....سامحيني

2008-01-23T13:39:00.000-08:00

يا الله ..لا ادري ما ذا اقول ولا اجد ماذا اكتب ..بل استحي من نفسي ..استحي من الله ..واستحي من اخواني في غزه ..وفي كل مكان ..اندم علي كل دقيقه فرطت فيها في حقهم ..علي كل سجده سجدتها ولم ادعو لهم ..علي كل حديث تحدثته ولم اذكرهم فيه ..هؤلاء الصابرين ..المجاهدين ..شهداء يمشون علي الارض ..كم يتقطع قلبي حسره كلما اتذكر حالهم ..يجوعون ويحاصرون ..المرضي لا يجدون الدواء ..الاطفال يبيتون في رعب من الظلام ..بينما اكتب انا الان هذه الكلمات وانا اجلس علي كرسي مريح في غرفه مضيئه واهلي من حولي ..يعاني الاف من اخواننا في غزه من الظلام التام ..مرضي مهددون بالموت ..لك الله يا شعب فلسطين ..سامحوني اخواني ..سامحونا جميعا علي تقصيرنا في حقكم ...يعلم الله كم يحمل اخوانكم في مصر هم قضيتكم ...لم ولن ننساكم ..سنظل نهتف بالدعاء ..نصر علي المقاطعه ..ننشر القضيه ..نبذل كل ما في وسعنا حتي يفرج الله كربكم ويذيح همكم واعلموا ان مع العسر يسرا.وانه كلما اشتد سواد الليل فهذا دليل علي قرب طلوع الفجر.

I am studying

2008-01-02T19:40:00.000-08:00

i am busy because of my exam

i hate this period from now until 24-1 -2008

i hate exames because it prevent me from all things i love ,my

blog, my friends, going out and even watching the news

please ,everybody pray for me.

سيبوا الملتزمين في حالهم

2007-11-25T03:05:00.000-08:00

الحرب علي الاسلام والملتزمين كل مدي بتزيد بطريقه مقرفه والاعلام بيتفنن في انه يشوه صوره الملتزمين والمحجبات والمنتقبات لما بقت حاجه تحرق الدم لدرجة ان مفيش مسلسل من المسلسلات اللي بتتعرض في التليفزيون او الفضائيات اليومين دول الا ويطلعو فيه واحد ملتزم او واحده منتقبه ويفضلوا يتريقو عليه ويصوروه في صوره مقززه انه متخلف ومتشدد ومنافق و... مثلا في مسلسل مطلعين شاب التزم وربنا هداه وبقي يصلي في المسجد مش علشان دي الفطره النقيه السليمه اللي ربنا خلقنا عليها لا ده علشان باباه ومامته سابوه ومهملين تربيته وضايع ومش لاقي حته تلمه وييجي اخوه يقول لابوه شوفت ابنك بسبب عمايلك السوده ضاع واتدروش وقريب اوي هيبقي ارهابي ....... حسبنا الله ونعم الوكيل هو اللي يلتزم بدينه ويروح المسجد ولا يربي لحيته يبقي ارهابي ؟؟ هو ده اللي الاعلام عايز يوصله للناس هي دي صورة المسلم عندهم ؟؟ولا بقي لما يقول لمامته لازم تلبسي النقاب علشان تخشي الجنه يقومو جايبين واحده هبله لابسه ازدال ونقاب وهي مش فاهمه حاجه والتانيه بقي العاقله اللي كاشفه شعرها تفضل تتريق عليها وتقولها هو انا ابقي كافره علشان مش لابسه النقاب ..يعني حاجه تخنق انا مش فاهمه هم معلقين علي النقاب والكفر ليه هم مفيش ملتزم عندهم غير لما يكون بيكفركل الناس ...وفي مسلسل تاني يطلعو الشباب في الجامعه في جماعه اسلاميه وايه متطرفيين وبيقولو للبنات اللي معاهم لازم برضه يلبسو النقاب ويجيبوها بتخلعه في اي حته وفي اي وقت ..لا ومش كده وبس دي بتكشف وشها قدام زمايلها الولاد اللي معاها في التنظيم ..هم دول مش رجاله ولا ايه ؟؟ولا يمكن قصدهم اخوات في الاسلام ..والشاب يطلعوه جاف وحاد مع امه وابوه ويعاملهم اسوأمعامله ومتشدد جدا مع اخته وبيحرم عليها كل حاجه في الوقت اللي بيعمل فيه هو كل حاجه ..هو ده الشاب الملتزم ولا حول ولا قوة الا بالله ...وفي مسلسل تالت يجيبو المهندس ساب الهندسه ودخل معهد اعداد الدعاه ..حتي معهد اعداد الدعاه مسلمش من تريقتهم والنصايح تنزل ترف علي دماغه اعقل يا بني وشوف مستقبلك اكنه بالظبط رايح ينتحر ولا يفجر نفسه.

انا عارفه كويس جدا ان الموضوع ده مش جديد والحمله الاعلاميه دي من زمان ايام عادل امام لما كان كل شويه ينزل فيلم يتريق فيه علي الاسلام والملتحين والمحجبات او من قبل كده كمان بس اليومين دول الحكايه بقت افظع لانه في المسلسلات اليوميه اللي بتتعرض في البيوت وكلها في توقيتات متقاربه وعامة الناس والشباب والبنات بيتفرجو عليها يعني بيدولهم كورس مكثف اللي ميتاثرش من مسلسل يتأثر من غيره ده غير ان الناس بتاخد المسلسلات انها حاجه واقعيه وبتصدقها مش شغل سينما مثلا زي الافلام

طيب بعد لما الناس تشوف الكلام ده كل يوم وكل شويه

ايه اللي ممكن يحصل لما اب يشوف ابنه بدأ يلتزم ده يبقي يا ويله وسواد ليله هيقوله انت عايز تبقي ارهابي ولا لما بنت تقول لاهلها انها عايزه تلبس النقاب هيقولها انتي مبتشوفيش المنقبين بيعملو ايه ولا بيتعمل فيهم ايه ..اصل الناس دي كل مصدر معلوماتها التلفزيون والمسلسلات ولا حول ولا قوة الا بالله

يعني هم عايزين من الاسلام والملتزمين ايه مش كفايه انهم كل يوم والتاني بيقبضو علي ده ويعتقلو ده كمان بيكوهو الناس فيهم ويشوهو صورتهم

انا طبعا لازم اقول في نهاية كلامي ان احنا كملتزمين عارفين كويس اوي طبيعة الحرب دي وعارفين برضه كويس اوي مين اللي هينتصر في الاخر وعمرنا ما هنيأس ابدا وكفايه ان الصادق المصدوق عرفنا ان ده هيحصل (تتداعي عليكم الامم كما تتداعي الاكله علي قصعتها.. وقال ان هييجي زمن الماسك فيه علي دينه كالماسك علي جمره من الناروان شاء الله بثباتنا ربنا هينصر ويعز الاسلام واهله

وان مهما يعملو ربنا هيقلبه ضدهم (لينصرن الله هذا الدين بالرجل الفاجر )وده بيحصل دلوقتي بالفعل زي ما احنا بنشوف الوعي الديني بيزيد وعدد الملتزمين وحتي المنتقبات في زياده مستمره وصدق الله اذ يقول (ان الذين كفروا ينفقون اموالهم ليصدوا عن سبيل الله فسينفقونها ثم تكون عليهم حسرة ثم يغلبون والذين كفروا الي جهنم يحشرون

بس دا برضه مش معناه ان احنا كملتزمين وحاملين امانة الدعوه نفضل قاعدين ومستنيين لما ربنا ينصر الدين بالفجره بالعكس علينا العمل ليل نهار لا نقيل ولا نستقيل لغاية ما نثبت للناس الصوره الصحيحه للاسلام والمسلمين والملتزمين وناخد بايد الناس كلها لبر الامان اللي يرتضيه الله ورسوله (وقل اعملوا فسيري الله عملكم ورسوله والمؤ منون وستردون الي عالم الغيب والشهادة فسينبئكم بما كنتم تعملون.

حبه فرفشه

2007-11-16T11:13:00.000-08:00

حبيبتي حفوصه حور الجنه مررتلي تاج علشان يفرفش المدونه شويه ياللا اما نشوف
هه استعنا علي الشقا بالله
1- قالولك اختار عصر من عصور مصرعلشان تعيش فيه تختار عصر اي حاكم ؟
اختار عصر الايوبيين والناصر صلاح الدين عصر عز الاسلام والجهاد اللي بحق والناس اللي كانت فاهمه يعني ايه اسلام وكانت مستعده تضحي بحياتها لنصره الدين واكيد كنت هبقي في اول الجيوش اللي راحت تحرر المسجد الاقصي.
2-اول اولويه في حياتك عيلتك ولا شغلك ولا اصحابك ؟
التلاته كل واحده علي حسب الموقف والوقت والظروف.
3-ايه اكتر حاجه بتحبها في رمضان ؟
صلاه القيام والاعتكاف وانتشار السمت الاسلامي حتي ولو كان مؤقت والتاخي بين الناس
4- اوصف اجمل افطار ممكن تفطره ؟

اي افطار يكون في ناس كتييييير بيبقي جميل بالنسبه لي وبالذات لما يبقي في خليط من ناس انا بحبهم اوي وناس معرفهمش واول مره اتعرف عليهم .
5- لو انت حاكم علي مجموعه من الافراد حتكون عادل ؟ طب هتتأ كد ازاي انك حاكم عادل ؟ا
ان شاء الله هكون عادله وهتاكد ازاي هجيب ناس كتير جدا استشرهم واعرض عليهم الامر بس ناس اكون متأكده انهم هيعنوني علي الحق والعدل ولوز مترجحليش اي حكم مش هحكم خالص .
6-مين اكتر اعلامي في مصر بتحترمه ؟
انا بحترم اي بني ادم محترم مبيأذيش الاخلاق او الدين بأي صوره من الصور يمكن ده مش موجود كتير في الاعلاميين المصريين بس ممكن نقول استاذ احمد منصور وممكن استاذ مجدي مهني.
7-لو ممكن تشتغل شغلانه تانيه كنت تتمني تبقي ايه ؟
هي الشغلانه الاولي غير اني طاليه حاليا هتبقي مترجمه التانيه اللي ممكن اتمنها اني ابقي صحفيه او مذيعه يعني اعلاميه بس طبعا محترمه

8-ايه تاني بلد تتمني تعيش فيها بعد مصر ؟
انا نفسي اعيش في اي بلد فيها حكم اسلامي بس نفسي اعيش في السعوديه طبعا مش علشان فيها حكم اسلامي ولا حاجه لان الحكم فيها في نظري لا يعتبر اسلامي اصلا الافي بعض المظاهر لكن علشان ابقي جنب الكعبه اللي النظر ليها بس عباده وابقي جنب قبر الرسول صلي الله عليه وسلم ومسجده.
9- اوصف ترتيبات اجمل فرح ممكن تحضره؟
امممممم مش عارفه بالضبط بس عموما اي فرح مهما كان بسيط بس الناس كلها فرحانه ووصل لهم هدف معين ووصل صوره حلوه للفرح الاسلامي يبقي بالنسبه لي جميل.
10-بتراعي كلام الناس والقيل والقال ؟ ولو اه او لا قول ليه؟
مش دايما بهتم بالقيل والقال لان الناس مبيعجبهاش العجب ومهما عملنا بيكلمه بس ده مش معناه اني مبسمعش للنصايح من غيري .
11-صحيت من النوم ملقتش الموبايل ولا الكمبيوتر ولا الكاميرا الديجيتال ورجعنا لعصر الحمام الزاجل والحصنه هتكون سعيد؟
لا معتقدش اني هبقي سعيده لاني اتعودت علي السرعه وعلي الحاجات دي وبقت جزء مهم من حياتي وبحس بالملل من غيرها.ومش هعرف اعمل حاجات كتيرمهمه.
12-عندك امل ؟ اسبابك؟

طبعا عتدي امل ببساطه لاني بثق في كلام ربنا اللي بيقول (ولا تيأسوا من روح الله انه لا ييأس من روح الله الا القوم الكافرون)وكلام حبيببنا صلي الله عليه وسلم (استبشرو بالخير تجدوه).
13- لما بتحب تهرب من كل شيء بتروح فين ؟
بطفي النور واقفل الباب وادخل انام .
14-امتي اول مره خدت فيها نفس طويل وقلت ياه دا انا كبرت ؟
لما بابا قللي دا انتي بقي عندك عشرين سنه ولسه فاكره نفسك عيله وعايزه تدلعي علينا.
ولما حسيت اني قربت اتم عشرين سنه.
15-بتشرب سجاير ؟وايه شعورك لما ست او راجل بيشرب سجاير وليه؟
لا طبعا ربنا يعافينا ويعافي المسلمين كلهم
بحس بقرف واشمئزاز وافضل انفخ وساعات بقوله ممكن تطفي السيجاره دي علشان اتخنقت.
ليه لانها حرام بكل ما تحمله الكلمه من معني .
16-بتعرف ايدك اليمين من الشمال ازاي ؟
بعمل نفسي بكتب واشوف ايدي اللي بكتب بيها تبقي اليمين والتانيه الشمال.
17-ايه اكتر اله موسيقيه بتحبها ؟
مبحبش الموسيقي بس بحب الدف عادي والاناشيد الهايسه.
18-ايه الحاجه اللي لو حصلت هتبقي سعيد اوي ؟
حاجات كتير يعني كل الحاجات اللي باتمناها لو حصلت هبقي سعيده .
تحب يبقي عندك ارض زراعيه ولا عربيات ولا كام عماره ولا فلوس في البنك ؟
يا سلام كلهم طبعا دا انا طماعه جدا وبعدين نعم المال الصالح للعبد الصالح او كنا قال صلي الله عليه وسلم واكيد يعني هعمل بيهم خير وهنفع بيهم الدعوه .
19-البحر ولا النيل ؟
الاتنين ما قلنا انا طماعه بحب البحر بالنهار وساعه الغروب لكن بخاف منه بالليل وبحب النيل في اي وقت .
20-مركب ولا طياره؟
الاتنين لاني بحب اجرب كل حاجه واي حاجه .
21-مجنون ولا عاقل ؟
يييييييييييييه هو انا لازم اختار اناساعات بحب الجنان جدا والتصرفات المجنونه والمفاجات بس برضه بحب العقل والناس العاقله جدااااااا.
22-تقرا كتاب ولا تتفرج علي فيلم ؟
حسب الحاله المزاجيه لحضرتي .
23-تمرر التاج ده لمين؟
انا محظوره

بحلم بالحريه

هتكلم وهقول

عصفور المدينه

ايام اخوان

الفاتح الجعفري

يااااااااااااااااااااااااااا رب

2007-10-29T01:36:00.000-07:00

ما هذه الحياه ؟؟؟ الي اين تذهب بنا ؟؟؟ ماذا تريد منا ؟؟؟الا تدوم فيها السعاده ؟؟؟تأخذ الانسان الي ذروه السعاده حتي يشعر انه لن يحزن بعد ذلك ابدا ....وفجأه !!! وبدون مقدمات ... يجد نفسه اتعس بشر علي وجه الارض.
احيانا ... يشعر الانسان انه وحيد رغم وجود عشرات بل مئات من البشر حوله ولكنهم كالهباء المنثور ... لا يشعرون به ...لا يستطيعون ان يفهموه ...
واحيانا اخري ... يجد نفسه يريد ان يبكي ويصرخ ويتألم ولكنه لا يستطيع ...لماذا ؟؟؟؟!!! لانه لا يريد ان يشعر احد ممن حوله انه حزين ... لانه ارتضي لنفسه ان يكون امام الجميع القوي الصابر العاقل الذي لا تغلبه الشدائد ولا تقهره العقبات ..يخفف عن الجميع .. وينصح الجميع بالصبر والحلم ..يأتي كل الناس الي صدره يبكون فيمسح دموعهم ويداوي جرحهم ...ولكنه حين يجد نفسه علي حافة الانهيار ..وحين ينهار ..يجد نفسه ينهار وحيدا ...لا يريد احد ممن حوله يلمح دموعه او يسمع انينه..لا يجد صدرا حانيا يضمه ..لعله جرحه المخصوص هو السبب .. اذ لا يستطيع البوح به .. يفضل الصمت.. ويؤثر الكتمان .
لماذا فرض هذا الغبي علي نفسه ان يكون هو البلسم لكل من حوله في وقت يحترق هو من داخله مثلهم بل اكثر بكثير ولا يشعر به احد؟؟ بل حتي لا يستطيع ان يخبر احد!! ماذا يقول ؟؟ لا يريد ان يقول كلمه واحده حتي لاقرب الاقربين له ..لمن ظن يوما ما انهم سيكونون دواءه عند حلول الداء .. لعلهم لم يصلو بعد الي هذه المرتبه ..لا يدري ماذا يفعل ؟؟غلقت كل الابواب ..ضاق الخناق ..انقطعت السبل ..وقتها لم يجد غير الله عز وجل يلجأ اليه ويذرف دموعه بين يديه ويتوسل اليه ان يفك كربه ويريح باله ويداوي جرحه ..يهمس في جوف الليل بصوت انين (انما اشكو بثي وحزني الي الله).
وحتي في هذه اللحظات ...وبعد ان يشرق الصباح ..تجده خائفا من ان يري احد اثر الدموع والحزن في عينيه ..يحاول جاهدا ان يداري وجهه الحزين ببسمه كاذبه ثقيله علي قلبه لكل من يلقاه في الصباح.
وهنا ...يشعر ايضا بأ ن الخناق يزداد والضيق يقتله..فيصرخ من اعماقه ..يااااااااااارب ..يااااااااااارب خذني في مكان بعيد عن عيون البشر ..عن هذه الدنيا الغادره ..اني اكرهها ..لا اريد البقاء فيها ..لا استطيع تحملها اكثر من ذلك ..اريد ان اذهب الي رحابك حيث الحياه الباقيه .

كفايه

2007-08-15T17:31:00.000-07:00

الواحد بصراحه اليومين دول خلاص مبقاش قادر يستحمل اللي بيسمعه وبيشوفه ، انا خلاص حسه ان انا هنفجر من الضيق، ايه اللي بيحصلنا ده، هو احنا عايشين فين ،احداث التعذيب اللي بنسمع عنها كل يوم زادت اوي وبطريقه غريبه ومرعبه ، دي مبقتش حالات فرديه ولا كام ضابط وامين شرطه مستقوين علي الناس، دي بقت مصييه وكارثه،خلاص مبقاش فيه امان ومبقاش فيه بلد من اصله ، شوفنا التفنن في طرق التعذيب اللي يضربوه واللي يطفو السجاير في جسمه واللي يرموه من البلكونه واللي يحرقوه واللي يكهربوه واللي يعتدو عليه ، دي وصلت للاطفال .لأ بقي اكيد في حاجه غلط ،حد يفهمني ايه السبب ،ولحد امته هيفضل ده يحصل ، يا تري احنا السبب، لازم نعمل حاجه ، انا عارفه ان في ناس كتير مش ساكته وبتعمل بس يا تري دا كفايه وهل حجم الاحتجاجات وردود الفعل زي حجم الكارثه؟هو في ايه تاني ممكن يحصل ، ده الواحد خلاص فقد الثقه في اي حاجه وكل حاجه ، ده انا مكسوفه اكتب انهم زمان كانو بيقولو ان الشرطه في خدمة الشعب ، يا تري النهارده لو واحده ماشيه في الشارع وحد ضايقها اوعاكسها ممكن تروح تستغيث براجل شرطه واقف في الشارع ؟؟ انا اشك في ده ولو انا شخصيا حصلي كده عمري ما هروح لراجل شرطه واقوله الحقني ، دا انا ممكن لو شفت راجل شرطه ماشي جنبي اخاف واروح امشي من طريق تاني ، خلاص الرموز دي انهارت ادمنا..بس الوضع ده هيفضل لحد امته ؟ لازم يبقي في حل لازم نعمل اي حاجه مش ممكن نعيش في البلد دي باللي بيحصل ده ربنا اكيد هيحاسينا علي كده هوه احنا هنسلملهم بلدنا ولا ايه ؟..والله حرام دانا لما كنت بتابع الاخبار وبشوف اللي بيعملوه اليهود في اخواننا كنت بقول ايه الظلم والقهر ده، فين كرامتنا وازاي نسكت علي الذل اللي بيحصل لاخواتنا ..هوه احنا هنسكت لليهود ونسيبلهم بلادنا ولا ايه؟ وتكررت نفس الكلمه الان لكنها مش عن اليهود للاسف ولكنها عن مصريين اقل ما يقال عنهم انهم مش بني ادمين والمحزن ان كلهم مسلمين ، طبعا دول ملهمش دين ولا مله بس علي الاقل بيقولو علي نفسهم مسلمين .مش لاقيه حاجه اختم بيها كلامي غير حسبنا الله ونعم الوكيل ،حسبنا الله في الظالمين

وجاء شعبان

2007-08-15T17:25:00.000-07:00

النهارده أول يوم فى شهر شعبان.. ياآآآه معقول عدت سنة كامله من شعبان اللي فات لحدالنهارده الواحد حاسس كأنهم يومين.. بس ياترى الأحساس ده بالنسبه للوقت بس ولا الأعمال اللى احنا عملناهافى خلال السنه؟؟؟ ياترى الواحدختم القرآن كام مره من بعد رمضان اللى فات...ياترى الواحد صام كام
يوم... ولاقام كام ليله...ياترى عملنا كام عمل في السنه دى نحس انه فعلاهيبقى يوم القيامه حجه لينا مش علينا...اسئله كثيره جدا بتدور فى دماغ الواحد عند دخول شعبان يمكن سببها ان اناعارفه ان السول - صلى الله عليه وسلم ــ قال ان شهر شعبان هوآخرالسنه اللى بترفع فيه الأعمال كلها... ياآآآه أد أيه انا مكسوفه أوى من ربنا وأنا بفكر فى كده مع كل التقصير اللى أنا عملاه فى كل واجباتى.. تقصير فى حق ربنا مخلينى حتى مش قادره أدعى بإخلاص ... حسه إن السنه كلها ذنوب فى ذنوب فى تقصير فى حاجات كتير.. يمكن الواحد عمل كل حجات كويسه بس تتعد على الصوابع ولوقارناها بحجات
تانيه مش كويسه هنلاقيها ولاحاجه دا غير ان كتير من الاعمال دي ممكن بكون مفيهوش اخلاص.. طيب.. ياترى الواحد بعد مافكر فى كل ده والواقع ده هيعمل إيه..نفسى في سنه جديده بجد.. سنه أكون فيها أقرب من ربنا ومن الجنه... سنه لومت فيها أبقى فرحانه إنى هقابل ربنا... ولوخيرت زى ما الرسول ـ صلى الله عليه وسلم ـ خيربين الموت والحياه يكون ردى "أريد أن أذهب إلى رحاب الله" نفسي في سنه يكون كتاب ربنا دايمافى قلبى زى ماهو ديما فى شنطتى .. يكون ذكر ربنا دايما على لسانى... تكون يدى دائما تبذل الصدقه فى السر والعلن... تكون التضحيه ومجاهده النفس واجب عملى بجد مش كلام نظرى ... تكون دعوة ربنا أحب إلى من نفسى وأهلى وحياتى كلها... أكون فى دراستى وفى كليتي مؤمنه بجدأن أناعلى ثغره من ثغرات الإسلام ولازم اسدها... تكون أخلاقى وعلاقاتى بكل الناس وأولهم أمى وأبى هتوصلنى فعلالأنى أكون أقرب مجلسا من حبيبى المصطفى يوم القيامه ...نفسي أحس أن رمضان السنه دى هيبقي أفضل رمضان فى حياتى وأكنى معشتش رمضان قبل كده...نفسي أن صلتى بربنا
توصل لأنى اكون مستجابة الدعوه لدرجة أنى لما أدعولإخوانى فى فلسطين أوالعراق أوفى أى مكان ربنا يستجيب... إنى فعلا أتذكرإخوانى فى كل وقت وافتكر الشهاده فى سبيل الله وأعد نفسى لها...
لعلها البدايه الآن... نعم دلوقتى حالآ... لعل دموعى التى تسيل الآن تطهرنى وتطهر كل من يقرأهذه التدوينه... لعلنا نتخذ عهدأمام الله ان نتغير الآن مع بداية شعبان... نستعد لرمضان استعداد من نوع خاص... استعداديكون كفيل اننانُعتق من النارواننامنرجعش تانى لحالةالتقصيراللى احناعليهادلوقتى... عهديكون كفيل بأننالومتنا دلوقتى حالا نكون ميتين على توبه نصوحه وندخل الفردوس الأعلى من غير
عتاب ولاحساب ابدأ أنا الآن وأعاهد الله على مافى قلبى وليعاهده كل من يقرأ هذه التدوينه.. لقد ولدنا الآن... ونريد ان نموت كما ولدنا... فاللهم ارزقنا الثبات وبلغنا رمضان وأمتنا على الشهادةفى سبيلك.ارجو من كل من قرأ هذه التدوينه ان يدعو لي بالاخلاص في القول والعمل وان يتقبل توبتي .ولا ننسي ان الرسول - صلي الله عليه وسلم- كان يكثر الصيام في شهر شعبان فلنقتدي به

التاج

2007-08-10T14:48:00.000-07:00

وصلني تاج من استاذ اسلام توفيق ربنا يكرمه ويجازيه خير لانه شجعني اني اكتب تاني في المدونه بعد غياب فتره ..هو التاج طويل شويه ..لأ طويل قوي ده تقريبا 30 سؤال بس انا ان شاء الله هجاوب عليهم
السؤال الاول
ما رأيك في جريدة الدستور؟
انا بعتبر ان جريدة الدستور من الجرايد القليله في الوقت الحالي اللي ممكن نقول عليها كويسه وبتجيب الحقيقه وبتتكلم بجراءه طبعا مع بعض التحفظات علي بعض الحاجات بس عموما هي كويسه.
ما رأيك في شوية المدونات دي(انا اخوان - ابن اخ-حلم الحريه -مش حاسكت -جهاد المصري)
مدونه انا اخوان من المدونات اللي باتبعها باستمرار علشان اعرف اخبار المدونين والجديد في عالم التدوين والاخبار عموما
مدونه ابن اخ بتعجبني جدا وفعلا باستفيد منها وبتعجبني الموضوعات اللي بيطرحها وطريقة تفكيره
مدونه حلم الحريه باعتبرها من احسن المدونات اللي عملها بنات الاخوان طريقه كتابتها واسلوبها جميل
مدونه مش حسكت وجهاد المصري مش بتابعهم اوي علشان احكم عليهم بس ان شاء الله نويت اتابعهم
هل بعد قراءتك للاجابتين اللي فاتو ..حسيت ان انا ايه ..ولاتنسي الصدق؟
انا مش فاهمه السؤال ده اوي بس شكلك بتعمل استطلاع رأي وبتحب تزنق الناس بأسأله غير متوقعه
هل تثق في جريدة الدستور ؟
نعم اثق فيها الي حد كبير
انا بحبكو في الله ..هل تحبوني ولاتنسي الصدق؟
انا طبعا مش عارفه مين كاتب السؤال ده اصلا بس عموما انا حب الاخوان بيجري في دمي وبحبهم كلهم في الله بصدق ..يسموها بقي تعصب او اي حاجه مش مشكله المهم اني بحب الاخوان بجد
هل تعمل في السياسه والعمل العام اكثر من الروحانيات والربانيات؟
انا بحب الروحانيات جدا لانها فعلا الزاد اللي بينفع الواحد وبيحركه في العمل العام ومبقدرش يوم يعدي عليه من غير روحانيات لاني بتعب جدا وممكن احس ان العمل مفيهوش اخلاص ..لكن بما ان العمل العام والسياسه بياخدو وقت كبير جدا من يومي فبحب اختم يومي غالبا بالروحانيات علشان انام مبسوطه ..يعني الموضوع محتاج موازنه ونحاول نكون زي الصحابه فرسان بالنهار ورهبان بالليل.
هل الدستور بتحب الاخوان ولابتستغلها؟
اكيد مش هيكونو بيحبو الاخوان محبه خالصه لوجه الله من غير مصلحه ولادوافع سياسيه بس هم معاهم في حربهم ضد النظام والفساد وده كويس
اسم مدونتك؟
بحلم
لماذا اخترته وما هي نيتك في اختياره؟
اخترته لاني فعلا عندي حلم كبير بحلمه ليل ونهار شاغل كل كياني وتفكيري وان شاء الله هكرس حياتي واعمل جاهده حتي يحققه الله الحلم ده انا كاتباه فوق مع اسم المدونه
هل فكرت في اغلاق مدونتك ولماذا؟
في الفتره اللي فاتت جالي احباط رغم اني كنت لسه عامله المدونه وفكرت اني مكتبش فيها تاني لاني كنت مشغوله جدا وقلت انا مش هضيف جديد وممكن استغل الوقت اللي هكتب فيه علي المدونه في حاجه تفيد الدعوه اكتر وكمان في ناس حبطتني لكن بعد التفكير غيرت رأيي
صورتك في المدونه ورمزيتها؟
مش حطه صوره
لماذا دخلت عالم التدوين من الاساس؟
اولا:الفكره عاجبتني جدا اني اعبر عن نفسي واتبادل الاراء والافكار مع غيري لاني اكيد هاستفاد واتعلم من كل الاراء سواء كانت معايا او ضدي
ثانيا: انا عايزه اتضامن مع اخواننا واساتذتنا الشرفاء المعتقلين فقلت اعمل المدونه دي وتكون منبر للدفاع عن الحق وابقي اعرف كل اقاربي وصحابي اللي ميعرفوش حاجه عن القضيه اوعن الاخوان اوحتي عن التدوين بالمدونه وابقي نفعتهم وعرفتهم حاجه ونشرت القضيه
ثالثا: كنت عايزه اعمل علاقات وصداقات جديده واتعرف علي ناس اكتر من خلال عالم النت الواسع بس في اطار مفيد ومحترم فقلت مفيش غير التدوين

رابعا: انا بحب الصحافه جدا والكتابه جدا.. يمكن اسلوبي لسه مش حلو بس اديني بتعلم واتدرب
جمله قيلت لك في وصف مدونتك ؟
لسه اصلامعرفتش حد كتير بالمدونه بس ان شاء الله بعد التاج ده همرره لناس كتير واستني تعليقاتهم ووصفهم
التعليقات بالنسبه ليك..اهميتها ؟
طبعا مهمه جدا وهي روح المدونه والا يبقي الواحد مااستفدش كتير
احلي بوست كتبته ..ضع اللينك ثم اكتب لماذا؟
لسه مجاش.. ومعتقدش ان انا اللي المفروض احكم الحكم ده الناس اللي بتقرأ هي اللي تقول
افضل مدونه قرأتها؟
بصراحه مقدرش احدد بس المدونات اللي بتعجيبني كتير وبالذات اللي بتمتاز بالبساطه وصاحبها بيعبر عن نفسه وانسانيته بدون تكلف وكمان اللي بيناقش المواضيع السياسيه بجرأه واللي بيغطو اول بأول الاخبار الجديده بتاعه المحاكمات والمسيرات والمؤتمرات والوقفات الاحتجاجيه والكلام ده
حد قل ادبه في التعليق ايه رد فعلك؟
محصلتش لسه بس لو حصلت عادي خالص هرد عليه بكل هدوء واشرحله وجهة نظري تاني وبعدين في الاخر هقوله لوسمحت يا ريت بعدكده تعلق بطريقه احسن لان النقاش مش بيكون كده
اسوأ بوست واسوأ مدون ؟

مفيش اسماء محدده لاني لما بدخل علي مدونه مبتعجبنيش مبدخلش عليها تاني فالبتالي بنسي اسمها بس عموما مبتعجبنيش المدونات اللي فيها الفاظ مش كويسه واصحابها مش بيراعو حرمة الحياء او الدين او المدونات اللي اصحابها ملهمش هدف غير انهم يضيعو وقتهم
هيحصل ايه لايميلك لما تموت؟
هيموت معايا
اديت الباسورد لمين ؟
مدتهوش لحد
كانت ايه علاقتك بيه؟
؟؟؟؟؟؟؟؟؟؟
اسمك ؟
اسماء
المشهور بيه وسط اصحابك ؟
اسمي الثنائي لان اسم والدي مميز
شخصيتك نوعها ايه ؟
يقال ان شخصيتي قويه وقياديه
السفر بالنسبه ليك ؟
حياتي اهواه ولو الموضوع بايدي يعني لو معايا فلوس وفي محرم تحت امري كنت لفيت العالم كله ورحت كل يوم بلد شكل لاني بحب اوي اشوف اماكن جديده واتعرف علي ناس جديده بس ده ميمنعش اني بحب بلدي جدا
وقت فراغك بتعمل فيه ايه؟
بزور اقاربي اوبقعد مع ماما وبابا اوبنزل اتمشي مع امي
المود بتاعك ؟
الحمد لله مبسوطه وباضحك دايما بس كتير ببقي مهمومه وحزينه علي حال الامه وعلي تقصيري في حق ربنا
الصفات اللي اخذتها من ماما؟
الحنان ونسيان الزعل بسرعه والتفكير كتير جدا قبل ما اخد اي قرارممكن نقول التردد
الصفات اللي اخذتها من بابا؟
قوة الشخصيه والقياديه وخفة الدم والنظام والعند احيانا
اكثر 6 حاجات بتحبها ؟
طبعا مش هقول ربنا والرسول لان دي مطبوعه في قلب الواحد
هم بابا وماما واخواتي والسفر ورمضان والقران وحلقات الذكر
اكثر 6 حاجات بتكرهها؟

النفاق وجرح المشاعر والانانيه والظلم والذل والبعد عن الدين
الانترنت بالنسبه ليك؟
حاجه مهمه جدا بقضي معاه وقت كبير مرايتي علي العالم الخارجي
هتمرره لمين؟

حبيبتي اروي الطويل وحبيبتي شذي واسماء الفجريه ومش هنبطل ويالا مش مهم وميت وانا اخوان ويحيي عياش

عقبال كل اللي زارني

2007-08-10T14:34:00.000-07:00

امبارح كان يوم من احلي الايام في حياتي مش لاقيه وصف تاني اوصف بيه اليوم كنت فرحانه فرحه غير عاديه وكان عندي استعداد اعمل اي حاجه اعبر بيها عن فرحتي ..امبارح كان خطوبة سيده صاحبيتي وحابيبتي واختي ورفيقة دربي ..اول واحده قعدت معايا اسره ..حتي لما الاسره كانت بتتغير ربنا قدر ان احنا الاثنين نفضل في اسره واحده لمدة 3 سنوات ..وحتي بعد ما اتفرقنا فضلنا اقرب اثنين لبعض ..لما بتكون مديقه بلاقيها بتتصل وتقولي انا جايالك دلوقت وبلاقيها بتحكيلي علي كل اللي جواها ..واحنا في المدرسه كنت انا وسيده في نفس السنه وفي نفس الفصل وفي نفس الديسك حتي كنت انا رائده الفصل وهي الوكيله ..لما دخلنا الكليه كان كل الناس فرحانه انها دخلت الكليه اللي هي عايزاها ..وانا كمان جبت المجموع اللي انا عايزاه ودخلت الكليه اللي انا عايزاها ..لكن كنت زعلانه جدا لاني هتفرق انا واصحابي وخصوصا سيده ..كنت كل يوم اجي من الكليه واقعد اعيط واقول لبابا انا لوحدي مش لاقيه اصحابي ومش قادره اعيش من غيرهم ..امبارح بقي دارت في بالي كل الذكريات دي وانا قاعده ابص في وجه سيده وهي قاعده جنب خطيبها ..من كتر فرحتي بيها كان قلبي عمال يدق وتخيلت اني اكيد يوم خطوبتي مش هبقي فرحانه اكتر من كده لان اصلا مفيش فرحه اكتر من كده .. اهل سيده كانوقايلين ان الفرح هيكون عائلي ومش هيعزمو حد والموضوع هيقتصر علي الاقارب المقربين ..سيده قالتلي كده وبعدين قالتلي وانتي طبعا هتيجي قولتلها طب طالما هم العيله بس انا ممكن مجيش قالتلي انتي بتهرجي ولا ايه انتي اصلا اول واحده تيجي وكمان انتي اصلا عيلتي ..كنت انا الوحيده اللي موجوده مع اخواتها وزوجاتهم واهل العريس ..كنت فعلا حاسه انه فرح اختي لما كانو بيعوزو حاجه وانا اخد الفلوس من مامتها وانزل اشتريها ..انا قررت اكتب عن اليوم ده في المدونه علشان احس اني انا خلدت اليوم وكمان عبرت عن حبي لسيده
الف مبروك يا سيده وعقبال العقد ان شاء الله

THE ANSWER

2007-07-18T16:44:00.000-07:00

To those who want to know who are the Muslim Brotherhood ,who want to realize their fact, their personalities and their feelings as human beings, so it is me ,one of them. you can not totally judge them only by me ,but you will find most of them like me. You can know me through my blog.

As a human, Muslim Brothers are an ordinary people, eat, drink, sleep, laugh, cry, smile, love and hate .We love life and want to enjoy it. We want to live in this world .We have many friends. No matter if those friends are like us or not in their political views or even in their religion ,but they must be trustworthy and honest.
.
concerning the role of youth in the Muslim Brotherhood ,we are like all young people in the world, but the difference is that the young Muslim Brotherhood members have thoughts, believe and dream .We believe that their is no life without freedom, justice and reform. We refuse any kind of domination and controlling .We want to express our opinions and practise our activities in an atmosphere of freedom and reality. We love our country. Our duty as patriots is to free the country from the betrayers who suppress and oppress the Egyptians, steal Egypt's funds and treasures and destroy its civilization. We also support all independent movements all over the world.

As a Muslim, we are very proud of our religion and at the same time we respect all other religions. We do not hate any body as a human being. Islam prevents us from harming anyone if he do not begin harming .We believe that people can love each other as humans but not under depression. Our Islam teaches us to respect others, not to differentiate between them because of their colures, tongue or race and all people are equal in their rights and duties. Muslim Brotherhood as true Muslims refuse violence and terrorism as Islam warns us from killing anybody either Muslim or not and considers it a crime. Allah said (If anyone killed a human being for another than murder or spreading mischief in the land, it would be as he killed all mankind, and if any one saved a life, it would be as if he saved the life of all mankind)
We believe that the best way to obtain our aims is to express our dream and opinions by wisdom and peaceful dialogue. We offer and view our programs and leave people choose if they are convenient or not .We never forced any person to follow our programs or religion as Allah said(there is no force in religion) We hope for all people around the world to live peacefully with us .

Nowadays ,as you know ,we suffer from our country's regime. the situation is very bad as most of our leaders are in the prisons ,facing unjust military tribunals. You might think that this can weaken us ,but it is not true because we always face our problems and difficulties with a strong will and deep firm as we believe that injustice will not still for a long time and justice always overcomes at the end.

بدايه

2007-07-08T08:53:00.000-07:00

الي من عشقهم قلبي... الي المخلصين في هذه الدنيا ...الي من احمد الله في كل ثا نيه علي انتمائي لهم... الي الاخوان المسلمين... الي كل حر شريف.. لم يرض بالمهانه ..ولم ولن يتنازل عن كرامته.. ممن يشاركني حلمي في العيش سويا بحب وسلام.. مهما اختلفت انتمائاتنا.. ويحترم كل منا الاخر..من انصار كفايه.. او الاشتراكيين الثوريين ..اوحزب العمل الاسلامي.. اوغيرهم ...الي كل من يزور هذه المدونه ..ويريد ان يعرف شيئا عن شباب الاخوان.. مشاعرهم.. ارائهم ..احلامهم ..الي كل هؤلاء اقول لكم جميعا... اني احبكم في الله... ولقد انشئت هذه المدونه لاعبر فيها عن رأيي فيما يحدث حولي ..ولنتبادل سويا افكارنا ورؤيتنا للاصلاح حتي ينصلح حال بلادنا الحبيبه.. واتمني من الله ان يجعلها في ميزان حسناتي وان اقدم شيئا جديداومفيدا..
وارحب بكل التعليقات والاقتراحات